LAOAG CITY – Nagpiyansa ti P90,000 ni dati a Senador Ramon “Bong” Revilla Jr. iti kaso a graft nga adda ti pakainaigan iti P92.8 million ghost flood control project iti Pandi, Bulacan.
Ti binayadan a piyansa ni Revilla ket para laeng iti kaso a graft iti Fourth Division Clerk of Court gapu ta saan a mapiyansaan ti kaso na a malversation.
Kayatna a sawen daytoy ket saan latta a mawayawayaan ni Revilla kabayatan a nakapenpen ti kaso na a malversation iti anti-graft court.
Iti agdama, nakabalud ni Revilla iti New Quezon City Jail iti Payatas, base iti commitment order nga inparuk-at ti Sandiganbayan Third Division.
Sumangsango ti dati a Senador kadagiti kaso a graft ken malversation of public funds through falsification of public documents iti Sandiganbayan Fourth ken Third Division.
Naipila dagiti kaso babaen ti Office of the Ombudsman kalpasan ti naisayangkat nga imbestigasyon iti pannakitinnulong ti Department of Justice, no sadinno nga adda ti nakita a probable cause nga awan ti proyekto a naaramid idinto a naideklarar a nakumpleton wenno nalpasen.
