LAOAG CITY – Inkari ni dati a Senate president Juan Miguel “Migz” Zubiri a tungpalen na ti pammilin ni Pope Francis a protehiran ti pamilya a Pilipino iti baet ti pumigpigsa a panawagan para iti pannakapagbalin a linteg ti diborsyo iti Pilipinas.
Nagkita ken nagsarita da Zubiri ken Pope Francis iti ibibisita ti dati a senate presidente kadwa na ti pamilya na idiay Vatican idi Huyo 5 ita a tawen.
Naituding a dumalan iti deliberasyon ti nailungalong a gakat a mapagbalin a legal ti diborsyo iti Pilipinas imbes a ti annulment of marriage a dakkel unay ti magastos nga isu ti kayat ti sumagmamano a senador a kas ken ni Senate President Francis “Chiz” Escudero.
Segun ken ni Zubiri, silulukat daytoy iti diskusyon ngem nagtalinaed ti pammati na a sagrado ken saan a rumbeng a mapukaw ti kasar.
Maipalagip a malaksid iti Vatican ket iti laeng Pilipinas iti intero a lubong ti saan pay a naaddaan ti linteg seknan iti diborsyo.
Nagturong ni Zubiri kadwa na ti pamilya na idiay Europa tapno makainana iti babaen ti ababa a sabbatical leave nga adayo iti politiko ken tungpalen ti “long-promised quality time” iti pamilya.
Inbatad ni Zubiri nga inlawlawag na ken ni Pope Francis a maysa daytoy a pro-life ken pro-family nga agpanpanday linteg manipod iti Pilipinas isut gapuna nga inbilin kenkuana ti Santo papa a protehiran ti pamilya.
