LAOAG CITY – Sinentensyaan ti maysa a korte idiay South Korea ti lima a tawen a pannakaibalud ni dati a South Korean President Yoon Suk Yeol kalpasan a napaneknekan a nagbasol para iti kaso nga adda ti pakainaigan iti obstruction of justice ken dadduma pay a krimen maipanggep iti kontrobersyal a panangideklarar na ti martial law.
Iti desisyon nga inparuk-at ni Judge Baek Dae-hyun ti Seoul Central District Court, napaneknekan a nagbasol ni Yoon iti pananglapped kadagiti imbestigador tapno arestaren da daytoy, kasta met ti saanna a panangiraman iti sumagmamano a miembro ti gabinete iti maysa a taripnong mainaig iti panagplano ti martial law.
Nupay kasta, napaawan basol ni Yoon iti kaso a panangpeke kadagiti dokumento gapu iti kinakurang dagiti ebidensya.
Naipaayan met ti dati a presidente ti pito nga aldaw tapno agpila ti apela na.
Immunan a kiniddaw dagiti prosecutors ti 10 a tawen a pannakabalud ni Yoon ken patawan ti dusa a patay kas maipagarop a lider ti maysa nga insurrection gapu iti panangipatungpal ti matial law.
Basar kadakuada, rumbeng laeng a mapatawan ti nadagsen a pannusa ni Yoon gapu ta maipagarop a saan a nangipakita ti panagbabawi iti pananggandat na a riribuken ti pagilian da.
Daytoy ket kalpasan a naobserbaran ti maipagarop a panagisem laeng ni Yoon iti uneg ti korte kabayatan ti pannakaibasa ti kiddaw a death penalty dagiti prosecutors.
Nagtalinaed met a natibker ti pagtaktakderan ti kampo ni Yoon a ti panangideklarar na ti martial law ket kas panangusar laeng ti emergency power ti presidente.
