LAOAG CITY – Nasentensyaan a mabalud iti tungpal biag ti agtawen ti 65 a dati a Presidente ti South Korea a ni Yoon Suk-yeol.
Daytoy ket kalpasan a nasentensyaan a guilty iti insurrection charges mainaig iti apagbiit a panangideklarar na ti martial law declaration no sadinno a nagpaot laeng iti innem nga oras idi Disyembre 2024.
Iti pannakaiyetnag ti sentensya ken ni Yoon iti Seoul Central District Court, inbatad ni Presiding judge Ji Gwi-yeon a nalawag nga intensiyon ti dati a presidente iti panangideklarar na ti martial law nga i-paralisa ti National assembly.
Basar pay iti korte, maipagarop a dinadael ni Yoon ti demokrasiya ti South Korea ken rumbeng laeng a mapatawan ti nadagsen a pannusa ti dati a presidente.
Innayon ti korte a ti panangideploy kadagiti armado a soldado iti pasdek ti parliament ken pannakaikabil da iti lugar iti babaen ti helicopter ket maysa nga aramid ti insurrection.
Kalpasan a nangngegan ti sentensya, saan a nangipakita ti emosyon ti dati a presidente to South Korea idinto a nakaro a pannakadismaya ken pungtot ti narikna dagiti rinibo a supporters ni Yoon a nagtitipon iti ruwar ti korte.
Ti defense minister ni Yoon a ni Kim Yong-hyun ket nasentensyaan met a guilty ken mabalud ti 30 a tawen.
Kabayatanna, dua kadagiti defendants ti saan a nasentensyaan a guilty karaman da Kim Yong-gun, dati a lider ti defense ministry investigation bureau ken Yoon Seung-yeong, dati nga opisyal iti police investigation bureau.
