LAOAG CITY – Innaganan ni Presidente Ferdinand ‘Bongbong’ Marcos Jr. ti dati a Supreme Court Associate Justice Andres Reyes Jr. kas chairperson iti Independent Commission for Infrastructure (ICI) nga isu ti agimbestigar kadagiti anomalya iti flood control projects.
Inrakurak na daytoy kabayatan ti press conference iti Kalayaan Hall.
Nagretiro ni Reyes idi May 2020, ti kaunaan a mahistrado a napadayawan babaen iti online retirement rites iti gapo iti quarantine ken physical distancing rules iti kangitingitan ti Covid-19 pandemic.
Nagserbi kas trial judge idi 1987, Court of Appeals justice idi 1999, presiding justice ti appellate court idi 2010, ken dinutokan pay ni dati a Presidente Rodrigo Duterte iti kangatoan a korte ti pagilian idi 2017.
Ni Reyes ti third generation justice, ken anak ni dati a Court of Appeals presiding justice Andres Reyes Sr., ken apoko ti Court of Appeals ken SC Justice Alex Reyes Sr.
Ummunan nga innaganan ti Malacañang ti dua a miembro ti Independent Commission for Infrastructure (ICI) a ni dati a Public Works and Highways secretary Rogelio “Babes” Singson ken Rossana Fajardo, ti country managing partner ken auditing firm SGV and Co.
Ni met Baguio City Mayor Benjamin Magalong ti agserbi kas special adviser ken imbestigador iti nasao a komisyon.
Iti Executive Order No. 94 ti presidente, ti “three-man team” ket isu ti agimbestigar ken agukkon kadagiti ebidensya, intelligence reports, ken impormasyon komtra kadagiti amin nga opisyal ken empleado ti gobierno kasta met kadagiti indibidual a karaman iti anomaly, iregularidad, saan nga usto a pannakausar ti pondo iti planning, financing, ken implementasyon ti flood control ken dadduma pay nga infrastructure projects iti pagilyan.
Prayoridad met ita iti imbestigasyon ti komisyon ti flood control ken dadduma nga infrastructure projects iti napalabas a 10 a tawen.
Ti Independent Commission for Infrastructure ket isu pay ti mangirekomendar ti pannakaipila ti kaso criminal, civil, ken administrative cases kontra kadagiti responsable iti disciplinary, prosecutorial, ken administrative bodies.
