LAOAG CITY – Nakigtot ni dati a sang bayan member Mel Acio iti Pasuquin, Ilocos Norte iti napasamak a pamaltog iti sango a mismo ti balay da iti Barangay Ngabangab ti nasao nga ili.
Inbatad na a masdaaw gapu ta awan pulos ti nangngeg da a putok ti paltog, ken nakigtot laengen idi makita na nga ado dagiti tattao iti sango ti balay da gapu ti napasamak a pammaltog.
Iti palawag ni Acio, dagiti biktima ket da Roland Salvador kenni Mary Ann Valenzuela, agpada dagitoy a residente iti Barangay Pangil iti ili a Pasuquin.
Segun ken ni Acio, dagiti biktima ket aggapo da iti Barangay Pragata iti nasao nga ili ken napan da nagdalos ti pakyaw da a sili.
Naamoan a napaltugan da Salvador ken Valenzuela bayat a nakalugan da ti motorsiklo no sadinno a dagiti suspek ket nakalugan da met laeng ti motorsiklo.
Kabayatanna, inadmitir ni Acio a saan dan a makaturturog gapu ta agbalbalin metten a “killing zone” iti asideg ti balay na gapu ta iti laeng kallabes ket adda manen dagiti napasamak a pammaltog ti nasao a lugar.
