LAOAG CITY – Inpasigurado ni Acting General Manager Perry Martinez, iti Ilocos Norte Electric Cooperative a mapagsungbat dagiti amin a responsable mainaig iti saan a pannakairehistro ti collecting system ti kooperatiba.
Segun kenkuana, agpapada a maimbestigar dagiti agdama ken dati nga empleyado iti kooperatiba tapno maamoan no apay a napasamak ti saan a pannakairehistro ti collecting system da iti Bureau of Internal Revenue.
Mainaig iti daytoy, nagpadespensar ni Martinez iti Bureau of Internal Revenue gapu iti nasao a pasamak.
Inpasingked na nga aramiden da amin a kabaelanda tapnu maurnos daytoy ken makikooperar da a nasayaat iti nasao nga ahensya.
Maipalagip nga immunan a nagturong ti Bureau of Internal Revenue iti nasao a kooperatiba tapno ipakaammo a sipod pay idi 2015 ket saan a nakarehistro ti collecting system wennu dagiti machine nga us-usaren dagiti meter reader.
