LAOAG CITY – Guilty ti nagbalin a desisyon ti Korte ken ni dati nga Autonomous Region in Muslim Mindanao (ARMM) governor Nur Misuari pakairamanan dagiti innem a kakaduana iti dua a kaso ti kurapsion mainaig iti anomalya a panaggatang iti P77 million a gatad dagiti learning tools manipud 2000 agingga 2001.
Sinentensiaan ti Sandiganbayan 3rd Division ni Misuari, a timmabuno iti indictment reading babaen ti video conferencing, iti 6-8 a tawen a pannakaibalud iti tunggal kaso.
Malaksid iti panaka-ibalud, iparit pay ti linteg nga agtakem ni Misuari iti aniaman a puesto iti gobierno.
Dagiti kadua ni Misuari nga akusado iti nasao a kaso ket da Leovgilda Cinches, Pangalian Maniri, Sittie Aisa Usman, Alladin Usi, Nader Macagaan ken Cristeta Ramirez.
Mainaig iti daytoy ket inlibak ni Misuari nga adda pakainaiganna iti P77 million a panaggatang kadagiti learning tools gapu ta maipagarop a nai-consummated daytoy idi panawen ti simmaruno kenkuana a ni Parouk Hussin manipud 2003 agingga 2004.
Inlawlawag pay ni Misuari a na-dismiss ti kasona a malversation of funds kas pammaneknek nga awan ti ebidensia a mangpaneknek iti aniaman nga irregular transactions a mainaig kenkuana.
Nu pay kasta ket saan a binigbig daytoy ti graft court gapu kadagiti natakuatan nga ebidensia.
