LAOAG CITY – Inyestoria ni Mr. Michael Guira, agtagikua ti maysa a catering services no kasano a nagbalin nga empleado laeng idi agingga a nagbalin daytoyen nga employer.
Segun kenkuana, saanna nga ilinged nga immutang pay daytoy ti 70 a ribu a pisos iti ulitegna para iti puunan ti negosiona.
Inbatadna nga addan ti 15 a tawen ti napalabasen sipod simrek isuna iti nasao a negosio no sadinno ket idi damona ket amin a ramit a mausarna ket abanganda.
Kunana a gapu ta nasayaat met isuna a tao ket adu dagiti tattao ti timmulong kenkuana nangruna idi kanito nga agkasapulanda ti tulong pinansial.
Inlawlawagna a saan latta a maliklikan nga adda dagiti gundaway a nakapsot ti pamastrekanda ngem agar-aramidda ti wagas tapno makaabrotda iti gastosda.
Mainaig iti daytoy, inpakaammo ni Mr. Guira nga agtawen pay laeng iti 22 idi nangrugi nga ipatakderna ti negosiona agingga a nasursurona nga ipataray daytoy nga isu ti nangsupusop kadagiti amin a kasapulanda iti panagbiag.
Innayonna a saan a lapped a saan a makaturpos iti panagadal laketdi adda ti diskarte ket kabaelan a sangoen ti aniaman a pannubok iti biag.
