LAOAG CITY – Linagip ni Mr. Gil Tamayo, dati a nagtrabaho kas cashier, bookeeper ken manager iti AFP Commissary and Exchange Service (AFPCES) iti Camp Aguinaldo dagiti pasamak idi naideklara ti martial law idi 1972 babaen kenni dati a Presidente Ferdinand Marcos.
Segun kenni Tamayo, agtawen idi ti 48 ken idi indeklara ni Marcos ti martial law ket awan pay unay dagiti napaspasamak ngem kalpasan ti 48 nga oras ket isu ti rugi ti panagamak dagiti tattao nga isu metten ti panakaiwaras dagiti ado a soldado, pulisya kasta pay nga ado dagiti militante.
Inbatad na a gapo iti daytoy ket nagrikep dagiti ado a negosyo ken daytoy ti nadlaw na iti ummuna nga al-aldaw iti pannakaideklara ti martial law.
Kunana a ti namunganayan ti deklarasyon ti martial law ket ti panagado dagiti makattigid a grupo ken arig na saanen a natalna ti Pilipinas.
Nupay kasta, kalpasan a naideklara ti martial law ket adda dagiti nagsayaatan na gapo ta saanen a maaramid dagiti dakes a tattao dagiti iligal nga aktibidad na, ken saan da unayen a makarwar.
Innayon na a gapo iti sabali a kapanunutan dagiti tattao ket arig na dakes ti epekto ti martial law ditoy pagilyan.
