LAOAG CITY – Natay kalpasan a napaltupaltugan ti dati a Hepe ti pulisya ti PNP-Laoag ken retiradon a pulis a ni P/Supt. Jeffrey Gorospe iti Bgy. 8 iti ili ti sarrat.
Segun iti PNP-Sarrat, manarimaan a makin-inum ni Gorospe kadagiti kakaduana iti maysa a kubokubo iti pasaet ti Bgy. 7 iti nasao met la nga ili idi paltupaltugan da dagitoy.
Natamaan ti patong ni Gorospe ken nanartaros iti bukot na babaen iti pannakaramat iti M-16 armalite riffle basar kadagiti narekubre a 11 a kapsula iti nadakamat a klase ti paltog iti nakapasamakan ti krimen.
Naamuan nga ugalin ti dati nga opisyal nga agpainum no aggapu da iti pagpapallutan.
Insigida a naitaray iti Black Nazarene Hospital iti met la nasao nga ili ngem neideklara a dead on arrival.
Agingga kadagitoy ket saan pay nga ammo no ania ti motibo ken no siasino ti suspek iti nasao a pamamltog.
Agtultuloy ti dragnet operation iti nasao a krimen.
