LAOAG CITY – Inbatad ni dati nga House Speaker Martin Romualdez a nadalos ti konsensya na iti baet ti alegasyon ni dati nga Ako-Bicol Partylist representative Zaldy Co nga isuda ken ni President Ferdinand “Bongbong” Marcos Jr., ti akin-utek ti pannakaipalipit ti P100 billion iti 2025 national budget.
Inpetteng ni Romualdez a kabayatan ti imbestigasyon ket awan ti siasinno man a public official, testido wenno contractor a nangitudo nga adda ti saan a nasayaat nga ar-aramiden na.
Kuna na a saanna a kayat ti agkomento iti napalabas nga statement ken alegasyon ni dati a Rep. Co gapu ta dagitoy ket naaramid iti babaen ti panagsapata ken awan ti bilegna iti korte.
Immuna a naglikudan ni Presidente ni Marcos ti alegasyon ni Co.
Inpaganetget pay ti presidente a saanna a kayat nga ikkan ti dignidad ti insawsawang ti dati a kongresista.
Malaksid iti maipagarop nga insertions, inbutaktak pay ni Co nga isuna a mismo ti napan nangideliber kadagiti maleta a nakaipalaunan ti minilyon a kwarta kada money Presidente Marcos ken Romualdez.
Kabayatanna, inrakurak ni Romualdez nga agtalek a ti Independent Commission on Infrastructure (ICI), Department of Justice (DOJ) ken ti Ombudsman ket tingitingen da a patas ken istrikto dagiti statements basar iti ebidensya.
Innayon na a nagtalinaed a nakasagana a makitinnulong iti aniaman a legal a proseso ken agtalek a rumuar ti kinapudno iti babaen ti usto nga institusyon.
