LAOAG CITY – Inpannakkel ni Senior Board Member Kichel Pungtilan iti siudad ti Batac a dati nga student leader ngem maysa itan a public servant.
Segun kenkuana, nagbalin nga inspirasionna ti amana a dati met a public servant a nagserbi kas Barangay Kagawad ken Barangay Chairman iti Barangay 35, Bil-loca iti siudad ti Batac agingga a nalpasna ti tallo a terminona kas Sangguniang Panlungsod Member iti nasao a siudad.
Inbatadna nga idi agad-adal daytoy iti elementaria, sekondaria agingga iti kolehio ket nagbalin isuna kas student leader.
Inlawlawagna a babaen iti daytoy ket ad-adda a naasa ti abilidadna a mangidaulo ken agserbi kadagiti umili agingga a napanunotanna ti sumrek iti lubong ti pulitika.
Kunana a nagbalin daytoy a Sangguniang Kabataan Chaiperson iti bukudda a barangay idi 2010, Barangay Kagawad idi 2013 ken Sangguniang Panlungsod Member idi 2019.
Mainaig iti daytoy, inpakaammo ti City Councilor a maysa kadagiti dakkel a karit kenkuana ket idi panawen ti pandemia no sadinno nga arig ket nagsardeng ti tayyek ti sangalubongan.
Nupay kasta, inpasingkedna a saan daytoy a nagbalin a tubeng tapno maipadanon ti serbisio publiko kadagiti naruay nga umili kangrunaanna dagiti nagsardeng iti pamastrekanda gubuay iti epekto ti pandemia.
Innayonna nga awan ti nagbalin a lapped tapno saan a maituloy iti panagserbina iti serbisio nangruna ket aggapu iti puso, ayat ken pannakilangen-langen kadagiti umili ti pigsa ken kired daytoy a tumulong iti publiko.
Kabayatanna, naammoan a sakbay a naelektaran kas konsehal iti siudad ti Batac ket nagtrabaho pay ni Pungtilan kas maysa a clerk ken extension worker.
