LAOAG CITY – Kiniddaw ni Prof. Cielo Magno, dati nga Undersecretary ti Department of Budget and Management nga agbalin a transparent ti bicameral committee tapno maammoan ti mapaspasamak a deliberasion iti 2025 National Budget.
Ginutigot ni Prof. Magno ni Cong. Isidro Ungab a mangipila ti kaso iti Korte Suprema tapno masolbar ti scope of work ti bicameral committee ken maammoan no ania ti pudno a rimmuar a report.
Segun kenkuana, babaen ti nasao a report ket isu ti makaibaga no iligal wenno saan ti 2025 General Appropriations Act.
Inbatadna a dakkel a saludsod no dagiti rimmuar a reports ket kurang wenno saan nga umiso ket masapol a maduktalan no asino ti nangipinal iti daytoy.
Inlawlawagna a saan a mabalin nga agpirma ni Presidente Ferdinand Bongbong Marcos Jr. no kurang dagiti nailanad iti dokumento.
Innayonna a no mapaneknekan a pudno dagiti blangko nga adda iti bicameral committee ket dakkel a pangibasaran nga ideklara nga iligal ti 2025 National Budget.
Immuna iti daytoy, adda ti nai-post iti online a naipalaon dagiti sumagmamano a dokumento a maipagarup nga adda ti anomalya a napasamak iti pannakatingiting ti 2025 General Appropriations Act.
