LAOAG CITY – Saan nga umanamong ni Prof. Cielo Magno, dati nga Undersecretary ti Department of Finance iti pannakaiyakar ti pundo manipud iti Philippine Health Insurance Corporation (PhilHealth) a maipan iti Department of Finance.
Segun kenkuana, naiget ti panangkontrana iti ar-aramiden ni Department of Finance Sec. Ralph Recto iti panangalana iti PhilHealth fund no sadinno ket dumanonen iti 30 a bilyon a pisos ti naalana.
Inbatadna a daytoyen ti maikadua a tranche ken adda pay ti sumaruno iti daytoy inton Oktubre a sabali pay a 30 a bilyon a pisos nga adda ti pakabuklan 89.9 a bilyon a pisos.
Inlawlawagna kalikagumna a malappedan daytoy nga addang ni Sec. Recto gapu ta awan ti nailanad iti linteg a mabalin nga alaen ti pundo ti PhilHealth para kadagiti dadduma a programa ti gobierno.
Kunana a nagkurang ti pundo para iti pannakaipatungpal kadagiti dadduma a proyekto imprastraktura ti gobierno gapu ta inpangpangruna ti Kongreso ken Senado dagiti pork barrel ken pet projects.
Gapu iti daytoy, kuna ni Prof. Magno a naikabil ti pundo ti PhilHealth kadagiti flood control projects ken ti pannakatarimaan kadagiti nadadael a kalsada nga imbes iti programa a pakabenepisiaran dagiti naruay nga umili.
Mainaig iti daytoy, inpalgakna a no agtultuloy daytoy a banag ket mangipakpakita a saanen nga epektibo ti gobierno iti panangipadanonna ti serbisio publiko ken ad-adda a kumaro ti korapsion ditoy pagilian.
Kabayatanna, nagpanawagan ni Prof. Magno kada House of Representatives Speaker Martin Romualdez ken Senate President Chiz Escudero a mapagbalin a livestream ti pannakaiyuswat ti bicameral meeting tapno maammoan ti amin ti pannakatratar ti pundo a kuarta dagiti umili.
