LAOAG CITY – Kinontra ni Mayor Albert Chua iti ciudad ti Batac ti inparuk-at a datos ti gobierno probinsyal idi kalman mainaig iti baro a bilang ti pimmusay iti nasao a ciudad.
Iti datos nga inparuk-at ti gobierno probinsyal, nailanad ditoy nga adda ti 20 a baro a pimmusay a covid-19 patients iti ciudad ti Batac idi kalman.
Inpetteng na a sipud idi Agosto 1 agingga iti Setyembre 15 ket umabot laeng ti 15 dagiti pimmusay a covid-19 patients iti ciudad ti Batac basar iti rekord da.
Inbaga na a mabalin a ti 20 a pimmusay a covid-19 patients iti ciudad ti Batac nga adda iti datos ti gobierno probinsyal ket nairekord sipud pay idi Hulyo ita a tawen ngem idi laeng kalman a naiparuk-at.
Inpakaammo pay ti mayor a sipud iti napalabas a tawen a panangrugi ti pandemya a gubuay ti covid-19 ket addan ti pakabuklan a 79 a pimmusay iti ciudad ti Batac.
Innayon na nga iti panagsaludsud na ket inpalawag da kenkuana nga agiparuk-at da laeng ti rekord no addan ti maisumitir a death certificate dagiti pasyente.
Nupay kasta, kuna ti mayor a nasaysayaat koma pay no maikabil no ania nga aldaw a pimmusay ti maysa a pasyente.
Kabayatanna, inlawlawag ni Doctor Norman Rabago, ti Covid-19 consultant ditoy probinsya a dagiti 20 a covid-19 patients a pimmusay iti ciudad ti Batac a makita iti datos ti gobierno probinsyal a naiparuk-at idi kalman ket saan laeng a maymaysa nga aldaw a napasamak.
Segun kenkuana, adda dagiti i-immunan a natnatay a saan a naidalos ti papeles da kangrunaan na ti death certificate isut gapuna a saan a nairekord ti gobierno probinsya.
Innayon na a dagiti nairekord a pimmusay ket nangrugi pay idi Hulyo agingga iti Setyembre ita a tawen.
Inkalintegan na a dagiti laeng adda ti death certificate na ti maipan iti opisyal a maikabil iti datos nga iparuk-at ti gobierno probinsyal.
