LAOAG CITY – Naminsan manen a dinayyeg ti napigsa a magnitude 6.9 a gingined idiay Manay, Davao Oriental iti oras ti alas-7:12 ti rabii ita a Biernes, Oktubre 10, sumagmamano nga oras laeng kalpasan a narikna ti magnitude 7.4 a gingined itay bigat.
Ti sabali manen a panagdayyeg idiay Davao Oriental ket kapigsa ti timmama a magnitude 6.9 a gingined idiay Cebu idi Setiembre 30.
Basar iti Philippine Institute of Volcanology and Seismology (PHIVOLCS), ti nasao a gingined ket nairekord iti 36 a kilomtero iti abagatan a daya ti Manay, Davao Oriental.
Adda ti kaunegna a 10 a kilometro ken tectonic ti nagrugianna.
Narikna ti Intensity IV idiay Davao City ken Bislig City idiay Surigao del Norte.
Agpada nga intensity met ti narikna iti lugar kas ti Magpet, Cotabato; Digos City, Davao del Sur; Sta. Maria, Davao Occidental; Nabunturan, Davao de Oro; Gingoog City, Misamis Oriental; Malungon, Alabel, Sarangani; Tupi, South Cotabato; ken Hinunangan, Southern Leyte.
Mainaig iti daytoy, nangiruar ti Phivolcs ti tsunami alert kagiddan ti aftershock.
Manamnama a ti umuna nga epekto ti tsunami ket iti nagbaetan ti alas-7:12 ti rabii agingga iti alas-9:12 ti rabii ken mabalin nga agtultuloy pay a dumakkel dagiti dalluyong iti uneg ti sumagmamano nga oras.
Mainaig iti daytoy, naabisoan dagiti residente nga adda iti asideg kadagiti kabaybayan iti nadakamat a probinsia nga insigida nga agibakwit iti nangatngato a lugar wenno nataltalged a lugar.
Nagballaag pay ti Phivolcs kadagiti pannakadadael ken aftershocks kagiddan ti sabali manen a panagdayyegna.
