LAOAG CITY – Maysa manen a baro a balligi ti nagun-od ti Region 11 wenno Davao Region iti Palarong Pambansa kalpasan a nagun-od ni Mechelle Ann Gonato ti balitok a medalya iti Triple Jump Girls – Secondary Category.
Daytoyen ti maikatlo a balitok a medalya ti Davao Region iti tinawen a paay-ayam.
Nagbalin nga emosional ni Gonato iti panangabakna, inadmitirna a saanna a ninamnama ti panagballigina kalpasan ti amin a rigat a napasaranna kadagiti napalabas a bulan a naiget a panagsanay.
Segun kenkuana, daytoy ti maikatlo a daras a nakipaset isuna iti Palarong Pambansa ken ita laeng a nagun-odna ti arapaapna.
Inburayna a ti inana ti nagserbi nga inspirasionna iti naisayangkat a labanna nangruna ket kaliplippas pay laeng a dimmalan iti operasion gapu iti bato.
Naammoan a kas gungguna, malaksid iti gold medal a maawatna iti Palarong Pambansa, manamnama a makaawat pay ni Gonato ti P45,000 manipud iti Region 11, P11,000 manipud iti lokal a gobiernoda ken P10,000 manipud iti pagadalanna.
Inpasingkedna nga ipaayna ti amin a maawatna a premio iti inana kas panagyaman ken tulong iti gastosen iti panagpaagas.
Kabayatanna, adda ti immunan a dua a balitok a medalya ti nagun-od ti Davao Region iti tay-ak ti Chess elementary girls iti babaen kada Hannah U. Segara ken Alexie M. Timkang ken iti Table Tennis elementary boys team da France Echo A. Apolonio, Estanlee B. Ceballos, Francis Carl M. Reyes ken Khrix Brylle G. Sagario.
Iti agdama, adda iti maika-9 a puesto ti Region 11 iti partial ken unofficial a datos ti medalya iti Palarong Pambansa 2025.
Agtultuloy ti namnama dagiti atleta manipud idiay Davao Region a makaiyawid pay ti pammadayaw para iti rehionda.
