LAOAG CITY – Maisayangkat ti Dawn Caracha Exercise 2024 ditoy Ilocos Norte inton bulan ti Nobiembre.
Daytoy ti inpakaammo ni Major Velasco ti Philippine Army apaman a nagatendar iti regular session ti Sangguniang Panlalawigan tapno agkiddaw ti pammalubos.
Segun kenkuana, daytoy ket maysa a bilateral exercise iti nagbaetan ti Philippine Army ken Australian Defense Forces.
Inbatadna a gagem ti nasao nga exercise a mangipaay ti oportunidad ti Philippine Army ken Australian Defense Forces a maipakita ti abilidadda, mapapintas ti koordinasion ken mapatibker ti panagkaykaysa.
Kunana a mangrugi ti panagsagana dagiti kameng ti military inton Nobiembre 1 ken 9 no sadinno a manamnama a sumangpet dagiti 111 a military, 81 manipud iti Philippine Army ken 30 manipud iti Australian Defense Forces ditoy siudad ti Laoag idinto nga inton Nobiembre 11 ket agturongda iti ili ti Pagudpud.
Inlawlawagna a mangrugi ti exercise inton Nobiembre 11 agingga 21 iti ili ti Bangui ken Pagudpud.
Mainaig iti daytoy, inpakaammo ni Major Velasco nga adda ti maisayangkat a land, firing, air ken maritime exercise ken adda dagiti mausar nga equipment ti pagilian ken iti Australian Defence Forces.
Inpettengna a dagiti aramidenda ket awan ti pakainaiganna iti agdama a situasion iti West Philippine Sea.
Innayonna nga amin dagitoy ket panagsagsagana kadagiti militar no adda ti sumangbay a pangta ti seguridad ditoy pagilian.
Kabayatanna, naammoan a ti makaimatang dagiti nasao nga aktibidad ti dua a pagilian ket dagiti kameng ti City wenno Municipal Disaster Risk Reducation and Management Office pakairamanan dagiti Local Government Officers ditoy probinsia.
