LAOAG CITY – Nangiruaren ti Department of Budget and Management ti pakabuklan a P3.681 billion tapno pundoan ti libre a Wi-Fi program iti intero a Pilipinas.
Naipaay ti pundo iti Department of Information and Communications Technology tapno mapagtalinaed ti pannakaipatungpal ti Free Public Internet Access Program (FPIAP).
Manamnama a mabenepisiaran iti nasao a pundo ti pakabuklan a 13,462 access point sites kadagiti nagduduma a lugar iti intero a pagilian.
Daytoy ket kas paset ti programa ti pannakaipasdek ken panagpatalinaed ti Information and Communication Technology Infrastructure kas ti towers, data centers ken internet connections.
Gagem pay daytoy ket tapno mapagtalinaed ti internet connectivity kadagiti pampubliko a lugar kas kadagiti pagadalan, libraries, parks ken transportation hubs.
