LAOAG CITY – Suportaran ni Department of Budget and Management Secretary Amenah Pangandaman ti panawagan ti health experts a nayunan pay ti budget ti bakuna kontra iti Human Papilloma Virus wenno HPV nga agbalbalin a makaigapu iti cervical cancer dagiti babbai.
Inpasigurado ti sekretaryo a supotaran da ti inlungalong ti Department of Health (DOH) a palawaen pay ti programa ti Human Papilloma Virus immunization para kadagiti babbai.
Inbatad na a kas maysa a babai ket maawatan na no kasanu ti kinapateg a maprotehiran kontra kadagiti sakit kas ti cervical cancer.
Ita a tawen ket nangilatang ti gobierno ti P537-M a pondo para iti Human Papilloma Virus vaccination program basar iti 2024 General Appropriations Act no sadinno a plano da a panayunan iti sumaruno a tawen.
Maipalagip nga idi Abril ket inrakurak ni Department of Health Secretary Ted Herbosa nga ilungalong na iti Department of Budget and Management a manayunan ti pondo ti Human Papilloma Virus vaccination gapu ta target ti departamento a mabakunaan ti 95% dagiti babbai nga agtawen ti 9 agingga iti 14 sakbay pay nga agbalin dagitoy a sexually active.
Basar iti datos, 17% laeng dagiti babbai nga agtawen ti 15 agpababa ti mairanranud iti libre nga Human Papilloma Virus vaccine ti Department of Health no sadinno a katukad laeng ti 2.7 milyon a babbai manipod iti pakabuklan a 16 a milyon.
Ti Cervical Cancer ti maika-apat a kangrunaan a cancer dagiti babbai iti intero a lubong, ngem nangatngato ti kaso iti Pilipinas gapu ta maikadwa daytoy iti kaadoan ti kaso cancer dagiti babbai.
Inpakaammo pay ti Department of Health a 12 a babbai ti matmatay iti kada aldaw gapu iti Cervical Cancer.
Ti Human Papilloma Virus ket maala iti unprotected sex kangrunaan na no addaan ti multiple sexual partner.
