LAOAG CITY – Binigbigen ni Police Chief Inspector Ryan Retotar, ti chief of police iti ili ti San Nicolas ti abogado a maipagarop a nangtutuk ti paltog kadagiti agayan-ayat ti nasao nga ili itay kallabes.
Daytoy ket ni Atty. Ramon Leano, taga San Nicolas ken Dean ti College of Law iti MMSU ti ciudad ti Batac.
Inbatad ni Retotar a basar ti palawag ti saanen a nagpabigbig a complainant, bayat ti panagdaldalyasat da ti nobya na a nakalugan ti motorsiklo ket maipagarop a naipig da ti pajero ti abogado.
Gapu ti daytoy, binallaagan ti complainant ti abogado a maip-ipig dan babaen ti panangtimpag na ti lugan na.
Nupay kasta, maipagarop a sinursurot latta ida ti abogado agingga ti arwangan ti simbaan ti nasao nga ili.
Inadmitir ti complainant a nangpidot ti bato sakbay nga immasideg ti ayan ni Leano ket ditoy a nakita na nga adda ti maipagarop a nakapaturong kenkuana nga ababa a paltog ti nasao nga abogado.
Inpakaammo ni Retotar nga awan ti plano ti complainant a mangipila ti reklamo isut gapu na a saandan a rumbeng pay nga imbitaran ti abogado iti opisina da.
Agpapan ita ket saan pay a naala ti bombo radyo ti kabibiangan ni Atty. Leano.
