LAOAG CITY – Sumango iti dusa a patay ti asinoman nga indibidual a mapaneknekan a nangrames iti lalaki man wenno babai kas panangpapigsa ti pannusa kontra iti sexual assault a nailanad iti Anti-Rape Law of 1997 a natalantan iti Senado.
Segun ken ni Senador Robin Padilla a mangpapigsa ti nadagdagsen a pannusa pakairamanan ti dusa a patay kontra iti sexual assault iti babaen ti gakat a Senate Bill No. 2777.
Nailungalong idi Lunes, gagem ti gakat a saan laeng a siguradoen a mas naig-iget ti linteg ti pagilian no di ket mas “gender-responsive,” gapu ta agpada a lalaki ken babai ti agbalbalin a biktima ti sexual assault.
Inbatad ni Padilla, nakailanad iti 1987 Constitution ti panangipaay ti kinapateg iti panangrespetar iti karebbengan dagiti tao no sadinno a mismo ti linteg ti nangibilin iti Kongreso nga ikkan ti prioridad ti linteg a protektaran ti karebbengan iti dignidad.
Innayonna nga adda ti panagsukisok ti Council for the Welfare of Children ken United Nations Children’s Fund (UNICEF) idi 2017 no sadinno ad-adu dagiti lallaki nga agtawen iti 13 agingga 24 ti nakapasar ti sexual violence maidasig kadagiti babbai.
Iti babaen ti ilunglungalong a linteg ni Padilla, ti reclusion perpetua agingga iti dusa a patay ket maipataw no ti rape ket napasamak usar ti deadly weapon wenno inaramid ti dua wenno ad-adu pay, no ti biktima ket agbagtit gapu iti napasamak a rape; no adda ti homicide a napasamak iti pananggandat a panagrames ken no ti rape ket napasamak karaman iti “aggravating wenno qualifying circumstances” iti artikulo.
