LAOAG CITY – Inbatad ni Dr. Charito Malicad, ti Information Officer iti ciudad ti Laoag nga addan ti listaan ti nagnagan a karaman iti imbestigasyon seknan iti mapukpukaw a declogger machine iti merkado publiko ditoy ciudad.
Segun kenni Malicad, ti declogger ket maiduldulin iti generator room iti merkado publiko.
Inlawlawag na a gapo iti daytoy ket posible a mapagsaludsodan dagiti in-charge wenno no siasinno ti akin-iggem iti tulbek.
Kunana a ti listaan dagiti nagan ket maited kenni Mayor Michael Marcos Keon ken maiyuswat to met ti imbestigasyon.
Mainaig iti daytoy, kuna ni Malicad a posible nga adda ti panagliway iti pannakapukaw ti nasao a declogger.
Nupay kasta, inbatad na a maimbestigar a nalaing ken no mapaneknekan nga adda ti nagliway ket mangipila da ti reklamo.
Ti declogger ket maus-usar iti drainage canal iti merkado publiko tapno saan nga agbarado.
