LAOAG CITY – Kwinestionaran ni Sangguniang Panlungsod Member Jason Perera ti maysa a resolusion a mangkidkiddaw a mangipalubos ti City Government babaen ken ni Mayor Michael Marcos Keon, a makipinnirma iti deed of donation manipud iti maysa a korporasion a makinkukua iti maysa a subdibision iti Siudad ti Laoag.
Kinunana a no dagiti maipasdek a silaw iti kalsada kadagitoy a lugar a naidonar iti siudad ket mismo a gobierno lokal ti mangbayad ket masapol a maamoan dagiti kondision iti lote a naidonar.
Sinalusodna no ana ti pakabenipisyaran ti siudad iti panangawat iti donasion kadagiti road slots wenno kalsada ken open spaces manipud iti korporasion.
Kabayatanna, kalikagom met ti presiding officer a rumbeng nga adalen ken trataren nga ummuna iti committee level ti nadakamat a banag sakbay a maidasar iti biang ti Sangunniang Panlungsod tapno maarisit a naimbag ti nasao a resolusion.
