LAOAG CITY – Mapabaro ti deed of usufruct a nagpinnirmaan ti Technical Education and Skills Development Authority (TESDA) ken ti gobierno probinsyal.
Daytoy ket agpaot iti 25 a tawen manipud 2026 agingga iti iti 2031.
Mainaig iti daytoy, inlawlawag ni Sang. Panlalawigan Member Saul Lazo, Chairman ti Committee on Laws a daytoy ket pre-renewal ti usufruct agreement ti ahensya ken ti gobierno tapno no adda ti nayon nga imprastratktura nga establisarenda ket al-alisto.
Malaksid iti daytoy ket tapno maiyalokaran ti pondo ti aniaman a development nga aramiden ti nasao nga ahensya ti gobierno.
Naamoan a ti lote a madakdakamat ket ti agdama nga ayan ti building ti Technical Education and Skills Development Authority iti Brgy. 2 Laoag City ken addaan daytoy ti kalawa a 500 square meters.
Kabayatanna, immanamong met ti amin a miembro ti Sang. Panlalawigan iti pannakaipalubos ni Gov. Cecilia Araneta Marcos a makipagpinneirma iti nadakamat nga ahensya para ti agtultuloy a pannakausar ti nasao a lote.
Maipalagip a ti Technical Education and Skills Development Authority ket ti kangrunaan nga ahensya a tumultulong para ti pannakaemplyo ken pannakadevelop dagiti skills ken talent dagiti Pilipino a kasapulanda ti ad-ado pay a resources para iti pannakaiyimplementar a nasayaat ti vision da.
