LAOAG CITY – Nangiparuk-at ti statement ni Atty. Michael Poa, ti pannakangiwat ti Defense Team ni Vice President Duterte, mainaig iti maikapat nga impeachment complaint a naipila kontra iti bise presidente.
Segun ken ni Poa, ti agsasaruno a pannakaipila ti reklamo ket saan a kaipapanan a pudno dagiti alegasyon, ken kas kadagiti immunna a kaso, sangwen da dagitoy iti umiso nga oras ken maiyataday iti konstitusyon ken dagiti maipatpatungpal a pagannurutan.
Ti maika-4 a reklamo ket inpila ni Atty. Nathaniel Cabrera manipod Batangas, ken inyendorsar da Deputy Speaker Paolo Ortega ken Rep. Bienvenido Abante.
Nailanad iti reklamo ti maipagarop a betrayal of public trust, culpable violation of the Constitution, saan nga umiso a panangusar ti pondo ken dadduma pay.
Inpila ni Cabrera ti reklamo kalpasan nga inrakurak ni Vice President Duterte ti panagpaidasig na a para presidente iti 2028 elections.
Nagtalinaed ti takder ti defense team a ti impeachment ket saan nga agbalin nga instrumento ti pulitika no di ket maysa a constitutional mechanism a masapol a maipadalan iti patas ken nainkalintegan a proseso.
