LAOAG CITY – Nagkiddaw ti depensa ni Vice President Sara Duterte iti Senate impeachment court a palubosanda nga agidatag ti rebuttal evidence kadagiti alegasion a sakupen ti tallo nga inbabawi nga articles of impeachment.
Inbatad ni Atty. Michael Wesley T. Poa, pannakangiwat ti defense team, saanda a konkontraen ti desision ti prosekusion nga i-withdraw ti Articles I, III ken IV.
Nupay kasta, ti kalikagumda ket no maikkanda pay ti gundaway nga agipasango kadagiti testigoda tapno sungbatan dagiti ebidensia a naidatagen partikular iti maipapan iti confidential funds ken grave threats.
Inpetteng ni Poa a napateg a mangngegan ti publiko ti agsinnungbangir a partido tapno maaddaan ti sibubukel a pannakaawat kadagiti alegasion.
Kunana a gagemda a mailawlawag dagiti testigoda dagiti isyu a tinalantanen ti prosekusion sakbay nga inikkat dagiti nasao nga artikulo.
Indasig pay ni Poa ti situasion iti impeachment trial ni dati a Chief Justice Renato Corona no sadinno a segun kenkuana, saan pay a nakaidatag ti ebidensia ti prosekusion kadagiti artikulo a naibabawi.
Iti agdama a kaso, immunan a nangirakurak ti testimonia ti prosekusion iti sumagmamano nga alegasion sakbay a nagdesision nga ibabawi dagitoy.
