LAOAG CITY – Kinumpirmaran ni PLt. Godofredo Ribuyaco, ti deputy chief of police iti PNP-San Nicolas a natay dagiti dua a driver ti motorsiklo a nagdinnungpar iti boundary ti San Nicolas ken Batac a paset iti Brgy. San Pablo iti ili ti San Nicolas.
Binigbig ni Ribuyaco dagiti biktima nga isuda Neil Alexis Castro, agtawen ti 21, helper ken residente iti ili Paoay kenni Edmar Lorenzo, agtawen ti 26, delivery rider ken residente iti Brgy. 23 ditoy siudad ti Laoag.
Segun kenkuana, dead on arrival ni Lorenzo idinto a natay bayat a matamtaming ni Castro.
Inlawlawag na a basar iti naiwayat nga imbestigasyon, agpada nga agawid dagiti biktima manipod kadagiti pagtrabahoan da idi napasamak ti insidente idi malem kalman.
Nu pay kasya, inbatad na agpada a nagovertake ni Castro nga agpapaabagatan a direksyon ken ti agpapaamianan a direksyon a ni Lorenzo.
Gapu iti daytoy, nagsinnabatda iti tengnga ti kalsada rason a naipurwak dagitoy manipod kadagiti inturong da motorsiklo ken puon ti panagsagaba da iti nakana a sugat iti ulo.
Mainaig iti daytoy, kuna ni Ribuyaco nga awan iti impluwensya ti nasanger dagiti biktima ngem posible a napaspasa ti taray dagitoy.
Kabayatanna, plano ti PNP nga agsasarita ti pamilya dagiti biktima ti desgrasya nu man pay awan ti mapilaan a kaso agsipod ta agpada a pimmusay dagitoy.
