Naikonsiderar a kas armado ken delikado ni Senador Ronald “Bato” dela Rosa iti baet ti agdama a standard protocol iti agtultuloy a panagsarak kenkuana tapno iserbi ti arrest warrant nga inisiyu ti International Criminal Court (ICC).
Daytoy ti sungbat ni National Bureau of Investigation (NBI) Director Melvin Matibag idi masaludsod no maikonsidera ti senador kas armado ken delikado kalpasan a timmalaw iti Senate premises ken kageddan ti shooting incident.
Inlawlawag pay ti NBI chief a paset daytoy ti standard protocol no sadinno nga no adda operasion mainaig ti maysa a pugante ket maibilang daytoyen kas armado ken delikado.
Imbilin pay ni Matibag kadagiti taoda iti district ken regional offices ti National Bureau of Investigation (NBI) tapno mangiwayat ti bukodda a monitoring kadagiti lugarda para iti posible a lead no sadinno ti ayan ti senador.
Kabayatanna, mamati met ni Matibag nga ammo ni dela Rosa no kasano nga aggaraw dagiti agipatpatungpal ti linteg ken no kasanoda a saraken daytoy gapu ta nagserbi daytoy kas hepe ti Philippine National Police (PNP).
