LAOAG CITY – Agtultuloy ti panagsagsagana ti probinsia iti panag-hostna iti Region One Athletic Association meet wenno R1AA ita a tawen 2024.
Inlawlawag ni Mr. Gene Reginaldo, Division Sports Officer ti Department of Education Division of Ilocos Norte a saan laeng a dagiti lugar a pakaisayangkatan dagiti ay-ayam ti kitkitaenda ngem karaman pay dagiti “billeting schools” a pagtarusan dagiti sangapulo ket uppat a delegasion.
Kunana a natun-uyan metten ti probinsia dagiti standard kadagiti “playing venues.”
Nupay kasta, inbatadna nga adda pay laeng dagiti kiddaw dagiti tournament managers a mangidaulo kadagiti nagdumaduma nga events kas iti nayun a pasilidad.
Inlawlawagna nga ikarkarigatanda a mangpataud kadagiti makidkiddaw a pasilidad.
Iti baet daytoy, kunana a ti laeng mabalinda a maipanamnama ket ti panangipaay ti probinsia kadagiti banbanag nga adda ditoy probinsia.
Kabayatanna, inpakaammona a naipagagangayen a maipatungpal ti “window hour” kadagiti “outdoor sports” iti panawen ti “summer” wenno kalgaw kas iti mapaspasangasangan nga aktibidad.
Segun ken ni Reginaldo, manamnama nga agsangpet dagiti nagdumaduma a delegasion ita nga aldaw Abril 19.
Kabayatanna iti met pre-pageant ti Search for Mr. and Miss Region 1 Athletic Association iti sumarsaruno ken solidarity meeting iti bigat ti Abril 22 ken iti malem ti pannakalukat ti Region 1 Athletic Association ken iti rabii ti koronasyon ti Mr. & Miss Region 1 Athletic Association ken mangrugi dagiti sports competitions iti Abril 23 ken agpatingga iti Abril 27.
Innayonna nga adda dagiti komite a napusgan a mangkita iti nagdumaduma a banbanag kas iti “health, safety and security” dagiti bisita pakairamanan dagiti mangkita kadagiti “billeting schools” iti koordinasion dagiti principal.
Kabayatanna, inpadanonna ti napalaus a panagyamanna ken ni Gob. Matthew Marcos Manotoc ken ti sibubukel a gobierno probinsial ti Ilocos Norte iti awan sarday a suporta nga ipapaayda iti Department of Education – Schools Division Office ditoy Ilocos Norte.
