LAOAG CITY – Kinumpirmaran ti Department of Health ti posible a panagbaba dagiti mairekrekord a kaso nga agsaksakit ti dengue ita nga agtultuloy ti panagngato ti heat index iti pagilian.
Basar iti ahensia, ad-adda a makissayan dagiti mabatbati a danum iti aglawlaw gapu ta mamagaan a mangitunda ti panagbassit dagiti lamok.
Inbatad mismo ni Assistant Secretary Albert Domingo ti Department of Health a ti bilang dagiti kaso ti dengue ket mabalin a bumagsak ita a bassit laengen ti mabalin a pagitlogan dagiti lamok.
Nupay kasta, naiget a nagballaag isuna iti publiko a saan latta nga agpakampante iti pangta iti nasao a sakit a posible a mangitunda ti pannakatay.
