LAOAG CITY – Ad-adalen ti Department of Environment and Natural Resources (DENR) a mangiwayat ti imbestigasion iti The Rise ken Monterrazas gapu iti panaglayus idiay Cebu iti kangitingitan iti panagduprak ti Bagyo Tino.
Daytoy ket kalpasan iti pannakababalaw ti mountainside residential project ti nalawa a panaglayus iti probinsia.
Karaman kadagiti nakaro a nalayus iti panagduprak ti Bagyo Tino ket dagiti siudad ti Danao, Cebu, Mandaue ken Talisay ken dagiti ili ti Liloan, Compostela ken Consolacion.
Mainaig iti daytoy, mamati ni Department of Public Works and Highways Sec. Vince Dizon a no ti maysa a proyekto ket makapadakes iti aglawlaw nangruna kadagiti watershed a mangprotprotekta kadagiti waterways ket nasken a makaala nga umuna ti pammalubos iti Department of Environment and Natural Resources ken Environmental Management Bureau (EMB) sakbay a maipatakder.
Binabalaw ni Dizon iti biddot a panangplano ken saan nga husto a panangipasdek isu a palpak ti flood control systems ti probinsia.
Immuna iti daytoy, rinugianen ti Department of Public Works and Highways (DPWH) ti imbestigasion iti flood control projects idiay Cebu manipud idi 2016 agingga iti 2025.
Kagiddan daytoy ti panaglayus kadagiti sumagmamano a lugar gubuay iti Bagyo Tino a nakatayan ti agarup 200 a tattao.
Kuna pay ni Dizon, kabinnuligda ti Independent Commission on Infrastructure (ICI) iti panangimbestigar iti proyekto sipod idi 2016 agingga iti 2025.
