LAOAG CITY – Inlawlawag ni Mr. Victor Dabalos, ti mangidadaulo ti Department of Environment and Natural Resources – Provincial Environment and Natural Resources Office ti impormasyon a nagsardeng ti panagpukan ti kayo ti Nuevo Solar Energy Corporation wenno NSEC iti Brgy. Paguludan-Salindeg ili ti Currimao.
Segun kenkuana, awan ti pakainaigan ti DENR iti maipagarup a pannakaisardeng ti pannakapukan dagiti kayo nga umabot iti 3,317 nga agoho gapu ta awan met pay ti naipadanon iti opisina da a report nga adda ti posible a nasalungasing ti kompania pakaseknan iti Forest Land Use Agreement banag a mabalin a rason koma daytoy a maipasardeng ti bileg iti naited a Tree Cutting Permit kadakuada babaen iti Gobierno Probinsial.
Inbatad na a nagkiddaw pay ti NSEC ti baro a Tree Cutting Permit iti DENR kalpasan a nagngudon ti immuna a permit nga innala ti kompania iti opisina da.
Inlawlawag na nga 60 nga aldaw ti bileg iti maited a Tree Cutting Permit rason a saan a mabalin a mapukan dagiti kayo no nagngudon ti validity iti inaplikaran a permit gapu ta maikanniwas iti paglintegan.
Kunana a basar iti kaudian a naawat da a report ket umabot iti nasurok 900 a kayo ti napukanen.
Kabayatanna, kinumpirmaran ni Mrs. Estrella Baby Sacro, ti Officer In Charge ti Provincial Government of Ilocos Norte – Environment and Natural Resources Office a napasardeng ti panagpukan ti kayo iti maiyestablisar a solar power project iti ili ti Currimao gapu ta kasapulan pay laeng ti panagpinnirma ti Memorandum of Agreement iti nagbaetan ti NSEC ken PGIN nga ibagian ni Gob. Matthew Marcos Manotoc.
Kabayatanna, iInlawlawag ni Barangay Chairman Rufino Malasig iti Barangay Paguludan-Salindeg iti ili ti Currimao a dakkel a tulong kadakuada ti sumsumrek iti barangay da manipud iti solar plant babaen iti Mirae Asia.Segun kenni Malasig, babaen iti naipaay ti solar plant ket nakagatang ti barangay da ti lugan nga usaren da iti panag-rescue no adda ti kalamidad.
Malaksid iti daytoy, babaen pay iti nasao a kompanya ket adda ti maysa nga scholar nga estudyante iti kolehiyo ita a tawen.
Inbatad na nga iti makatawen ket umabot iti 1.3 a milyon a ti Real Property Tax a sumsumrek iti barangay da.
Kunana a babaen iti daytoy a kantidad ket ado met dagiti maaramidan ti barangay da ken plano da nga establisaren ti hanging bridge a kumamang iti ili ti Paoay.
Nupay kasta, kunana nga iti agdama ket adda pay laeng ti 2.6 a milyon a pisos a kwarta na para iti hanging bridge a mapatta-patta nga agbalor ti 6.8 milyon a pisos.
Mainaig iti daytoy, kalikagom ti kapitan a maiprayoridad kuma dagiti kabarangayan na nga agtrabaho iti kompanya gapo ta iti agdama ket tallo laeng ti naempleyo.
Immapela ti kapitan iti kompanya a supusupan da kuma no anya ti pagkurkurangan da.
