LAOAG CITY – Inpasigurado ti Department of Environment and Natural Resources (DENR) ken ti Philippine Crop Insurance Corporation (PCIC) nga adda ti umdas a suplay ti high value crops dagiti mannalon ditoy probinsia.
Segun ken ni Mr. Victor Dabalos, ti mangidadaulo iti Provincial Environment and Natural Resources Office, adda ti agarup 70 a people organizations ditoy probinsia ken manamnama a dagiti high-value crops-da ket maaddaan ti seguridad para iti proteksionda no adda kalamidad a sumangbay.
Inbatadna a tapno mapapartak ti panagrehistroda iti panag-avail iti insurance package ket nangiyuswatda ti Department of Environment and Natural Resources -Forest Management Bureau ken ti Philippine Crop Insurance Corporation iti caravan kadagiti high-value crops iti Centennial Arena iti kallabes.
Mainaig iti daytoy, dagiti forestry ken agroforestry ket mabalin nga ag-avail iti agdama a programa ti Philippine Crop Insurance Corporation nga High Value Crops (HVCs) ket pakairamanan ti falcata, mahogany, narra, lauan, kawayan, kape, cacao ken dagiti fruit bearing trees.
Kabayatanna, iti panagbitla ni Gov. Matthew Marcos Manotoc ket kunana a maragsakan unay ta adda daytoy a programa a dakkel a makatulong kadagiti mannalon ditoy probinsia.
Naammoan nga adda ti uppat nga high value crops ti probinsia ita a tawen tapno ma-maximize ti panagdur-as ti ekonomia iti kape, cacao, kawayan ken asin.
Kamaudiananna, ti nasao a programa ket panggepna a siguradoen ti seguridad ti produkto dagiti mannalon babaen ti pannakaited ti Insurance Policies kadagiti mannalon.
