LAOAG CITY – Inaprobaranen ti Philippine Health Insurance Corporation (PhilHealth) Board ti umuna a preventive oral health care benefit package ti pagilian.
Naragsak nga inpadamag ni Health Sec. Teodoro Herbosa a karaman payen iti baro nga health benefits package ti panangtaripato iti ngipen.
Ti panangaprobar ket kageddan ti pannakipaset ti pagilian iti kaunaan a World Health Organization Global Oral Health Meeting idiay Bangkok, Thailand.
Babaen iti daytoy, sungbat ti state health insurer ti agingga P1,000 oral health benefit iti kada tawen para iti preventive oral care services dagiti miembro. P300 para iti umuna a panagbisita, sakupen ti mouth examination/oral screening, oral prophylaxis (cleaning) ken flouride varnish application.
P300 para iti maikadua a panagbisita a saan a bumaba iti uppat a bulan kalpasan ti umuna a panagbisita para iti kapada a serbisio.
P200 met ti kada ngipen (maximum a dua a ngipen iti kada tawen) para iti pit and fissure sealant ken Class V procedure.
Saan a karaman iti benefit package ti bunot, segun ken ni Department of Health (DOH) Asec. Albert Domingo.
Mausar ti nasao a benepisio kadagiti primary care facilities kas ti Bagong Urgent Care and Ambulatory Service (BUCAS), centers ken rural health units.
Inbatad ni Domingo, manarimaan pay laeng ti pannakatratar ti circular maipanggep iti oral health care benefit package pakairamanan ti payment mechanism a plano a mairuar ita a Disiembre.
Gagem ti PhilHealth nga ipatungpal ti dental services iti umuna a kuarter ti 2025.
