LAOAG CITY – Ipalubos ti Professional Regulation Commission a mabalin nga agserbi kas vaccinators dagiti dentista ngem kasapulan ti emergency order ti Department of Health.
Daytoy ti inpakaammo ni Metropolitan Manila Development Authority (MMDA) chairman Benhur Abalos Jr.
Iti panagreport ni Abalos kenni Presidente Rodrigo Duterte, nakasarita na dagiti Rotary Clubs, Philippine Dental Association, ken Professional Regulation Commission tapno tumulong iti panagbakuna kadagiti probinsya wenno ruwar iti Metro Manila.
Kuna ni Abalos a ti pannakaipalubos nga agbakuna dagiti dentista ket saanen a kasapulan a maamendaran ti linteg rason nga adu a manpower ti maipaay da.
Inpakaammo ni Abalos a nupay 85 a porsiento ti kaado dagiti nabakunaan a residente iti Metro Manila ket sidadaan dagiti local chief executives iti metropolis a bakunaan da dagiti residente nga agnanaed kadagiti kaasideg da a probinsya.
