LAOAG CITY – Sinuspenso ti Department of Education (DepEd) ti klase ita nga aldaw idiay Big island ken Maui island gapo ti epekto ti hurricane “Lane” idiay Hawaii.
Daytoy ti kinumpirmaran ni Bombo International Correspondent Manny Pascua idiay Hawaii.
Agpapan maisursurat ti damag ket saan pay a marikna dagiti residente ti isla ti epekto ti hurricane wenno normal pay laeng gapo ta awan pay ti mapaspasaran a napigsa a tudo ken angin.
Segun kenni Pascua, dagiti sabali a puli ket madandanagan dan iti mabalin a pasaren da wenno ti epekto ti hurrucane Lane iti nasao nga isla.
Nupay kasta, kuna a dagiti Pilipino ket arig na narwam da iti bagyo ditoy Pilipinas gapo ta saan da pay laeng a marikna ti agamak iti hurricane.
Inbatad na a saan met a nagpukaw ti elektrisidad iti nadakamat a lugar ken adon a tattao dagiti naggatang iti nagduduma a makan ken danum.
Mainaig iti daytoy, kuna ni Pascua a no dumegdeg ti dakes a panniempo ket dagiti agmulmula ti papaya ti kangrunaan a maapekataran.
Maipalagip a naibayog iti Category 5 ti hurricane Lane ti gapo ti manamnama a panag-landfall na iti isla.
