LAOAG CITY – Inadmitir ti Department of Agriculture (DA) nga adda panagbuteng da iti posible nga epekto ti napigsa a bagyo ken La Niña iti produksion ti taraon ditoy pagilian.
Iti Malacañang Insider, kinuna ni Laurel nga idi napalabas nga El Nino, bimmaba ti produksion ti bagas iti umuna a kagudua ti tawen gapu iti nakaro a pudot.
Kinunana nga adda ti umno a pundo ti gobierno ken namnamaen da a mapasubli ti napukaw iti umuna a kagudua ti tawen, basta saan a madangran ti pagilian iti napigsa a bagyo.
Mainaig iti daytoy, ipatungpal ti ahensia ti emergency procurement para kadagiti backhoe ken bulldozer a maideploy kadagiti nalayus a lugar.
Daytoy ti makatulong a mangkissay iti epekto ti layus iti nabatbati a bulan daytoy a tawen.
Malaksid iti daytoy, papigsaen pay ti Department of Agriculture ti insurance kadagiti talon tapno no adda adda napigsa a bagyo a sumangbay ket maipaay a dagus ti kuarta kadagiti mannalon a mangirehistro kadagiti apitda, ken adda maaramat iti panagmula da manen.
