LAOAG CITY – Nagpalagip manen ti Department of Agriculture (DA) kadagiti mannalon ken mangngalap ti posible nga epekto ti bagyo a Leon.
Segun iti Department of Agriculture, sumagmamano a probinsia iti Northern Luzon ti manamnama a maapektaran iti nasao a bagyo.
Gapu iti daytoy, ginutigot ti ahensya nga apitenda dagiti mabalinen a maapit ken ikonsiderar da ti agusarda kadagiti pasilidad kalpasan ti panagapit ken dalusan dagiti irigasion ken embankment tapno malapdan ti layus.
Malaksid kadagiti mannalon ket pinalagipan pay ti Department of Agriculture dagiti mangngalap.
Ngem nu pay kasta, impasigurado ti ahensya nga agtultuloy ti panagsagana da tapno matulongan dagiti mannalon ken mangngalap a naapektaran iti bagyo.
Karaman ditoy ti pre-positioning ti bin-i ken pannakibinnulig kadagiti opisina ti lokal a gobierno ken Regional offices ti Disaster Risk Reduction and Management.
