LAOAG CITY – Nakasaganan dagiti kongkreto nga addang ti Department of Agriculture (DA) tapno masolusyunan ti pangta ti El Niño ken maprotehiran ti sektor ti agrikultura kontra iti epekto ti El Niño ken panagkurkurang ti danom iti pagilian.
Iti press briefing iti Malacañang, inbatad ni Presidential Communications Office (PCO) Undersecretary ken Palace Press Officer Claire Castro a saanen a baro iti pagilian ti pangta ti El Niño isut gapuna a nasapa ti panagtignay ti gobierno tapno maalay-ayan ti epekto na kadagiti mannalon ken iti suplay ti taraon.
Segun ken ni Castro, binilinen ti ahensya ti National Irrigation Administration (NIA) nga establisaren dagiti lugar a mabalin a maapektaran ti panagkurkurang iti danom, karaman dagiti sakupen ti kangrunaan nga irrigation systems kas ti Magat Dam ken dadduma pay a napapateg a pagalaan ti danom iti pagilian iti babaen ti Upper Pampanga River Integrated Irrigation Systems (UPRIIS) a mangipapaay ti irigasyon kadagiti mannalon.
