LAOAG CITY – Plano ni Agriculture Secretary Francisco Tiu Laurel Jr. ti mangipasdek kadagiti composting facilities tapno mai-convert dagiti biodegradable wastes iti organic fertilizer.
Kunana a daytoy ti agbalin a sungbat iti problema dagiti mannalon seknan iti nangato a presyo ti commercial wenno chemical fertilizer, nga isu ti mangparparigat kadagiti mannalon.
Segun ken Laurel Jr., ti ganuat ket saan laeng a mangsuporta iti sustainable farming ditoy pagilian no di ket maksayan pay ti synthetic fertilizer ken pestisidyo nga ususaren dagiti mannalon.
Iti babaen ti plano ti Department of Agriculture, ket mabalin a mailako dagiti dagiti ma-produce nga abono iti nalaka a presyo.
Kunana a daytoy ti agbalin a dalan tapno bumaba ti gastos dagiti mannalon ken mapababa pay ti cost of production, ken mapangatu ti return of investment.
Kabayatanna, ti pasilidad ket pondoan iti babaen dagiti nagduduma a banner program ti Department of Agriculture, idinto a ti Bureau of Soils and Water Management a mangi-implementar iti tulong ti regional field offices.
