LAOAG CITY – Tuttutukan ti Department of Agriculture (DA) ti problema iti suplay ti sili kalpasan nga immabot iti ₱800 iti kada kilo ti presyo iti Metro Manila, dakkel ti nagngatoan na manipud iti ₱550/kg iti katengaan ti Agosto ken ₱350/kg idi Hulyo.
Segun kenni Agriculture Secretary Francisco Tiu Laurel Jr., posible a mailako iti nalaklaka a balor ti sili iti Kadiwa ng Pangulo outlet no adda ti nayun a suplay.
Inlawlawag na a mangkitkita da ti opsyon tapno umado ti suplay kalpasan ti panagbaba ti produksyon gapo iti panagtudo a napasaran iti Ilocos, Central Luzon, ken Bicol.
Basar iti report ti Department of Agriculture, ti “supply gap” ket gapo iti bassit ti nagmula ken iti dakes a paniempo a napasaran kageddan ti panangirakurak na a kasapulan ti rain shelters, greenhouses, husto a crop scheduling, ken nasayaat a supply chain.
Innayon ni Assistant Secretary Arnel de Mesa a dakkel a tulong ti research and development nangruna iti greenhouse technology para iti suplay ti sili uray daytoy ket seasonal crop.
Maipalagip nga idi Setyembre 3, ti presyo ti sili iti National Capital Region ket adda iti nagbaetan iti ₱400 agingga iti ₱800/kg, ken addaan ti prevailing price a ₱700.
