LAOAG CITY – Nagbaliw ti pagannurutan ti Department of Education no maipapan iti panagkanselar ti klase.
Inrakurak daytoy ni Department of Education Secretary Sonny Angara iti interview kenkuana iti umuna nga aldaw ti panaglukat ti klase para iti school year 2025-2025.
Inlawlawag na a no iti naglabas nga school year ket makanselar a dagus ti klase iti kindergarten no maideklarar ti bagyo pagsenyalan numero uno, ngem ita ket nakadependen iti lokal a gobierno iti ciudad wenno municipalidad nga agdesisyon gapu ta isuda ti mismo a makatingiting iti sitwasyon.
Innayon na nga adda pay dagiti dadduma a pagadalan a nagkiddaw a no saan unay a napigsa ti bagyo ket saanen a makanselar ti klase.
Immuna iti daytoy, paipaspasigurado ni Presidente Ferdinand Marcos, Jr. iti Department of Education (DepEd) a siguradwen a napintas ti serbisyo ti danom ken kuryente kadagiti pagadalan iti intero a pagilian.
Inpasingked met ti presidente a buo ti suporta ti gobierno iti edukasyon.
