LAOAG CITY – Inbatad ni Department of Education Regional Administrative Officer V ken Region 1 Official Spokesperson a ni Cesar Bucsit nga agtultuloy ti panag-monitor dagiti monitoring team officials ti Department of Education Region 1 ken ti Schools Division Office ti Ilocos Norte kadagiti nagduduma a sports events iti Region 1 Athletic Association Meet 2024.
Daytoy ket indauloan ti Regional Sports Officer Ryan Bantiding no sadinno agturong dagitoy kadagiti nagduduma a playing venues ken billeting areas iti bigat agingga malem tapno maamuan ti situasion dagiti atleta.
Inbinglayna a maragsakan daytoy ti agtulyuloy a panagsangpet dagiti resulta ti nagduduma nga ayayam iti nadakamat nga aktibidad nga inpaima ti chairman iti committee on games and result a ni Jun Howard Rioveros.
Nupay kasta, ti Partial and Unofficial Results ti Medal Tally iti Regular games ket nagtalinaed ti Pangasinan II Schools Division iti ummuna a puesto, ti Laoag City Schools Division addaan ti maikaudua, Ilocos Norte Schools Division addaan ti maikatlo a puesto, maikapat a puesto ti Ilocos Sur ken maikalima ti La Union.
Inpakammona a mannarimaan pay laeng ti pannakaisayangkat dagiti nagduduma nga ayayam kas kadagiti outdoor ken indoor games.
Mainaig iti daytoy, dagiti outdoor games ket maiyuswat ti ala-sais ti bigat nga agpatingga iti alas-nuebe wenno alas-dies ti bigat a nakadependar no kasano ti kinabara ti paniempo.
Innayonna a ti pakabuklan ti panag-iingawan dagiti contigents ti Region 1 Athletics Association Meet a gold medal ket agdependar no mano ti pakadagupan dagiti ayayam a pakipartisiparan dagiti atleta iti elementary level ken secondary level.
No sadinno ti benneg ti secondary category ket addaan ti 26 a regular sports game ken ti met elementary category ket addaan ti 19 a regular sports game.
Gapu iti daytoy, dagiti nadakamat a bilang ti regular sports game ket iso ti pakabasaran dagiti bilang iti medalya a magun-od dagiti atleta ti mannarimaan a Region 1 Athletic Association Meet 2024.
Nanamaaenda a ti naipaay nga oras ti panagay-ayam kadagiti outdoor games ket umunay ken saan a maaddaan ti extension.
Malaksid iti daytoy, nu man dagiti tartaraudi nga ayayam ket maisayangkat daytoy iti aldaw ti Sabado, Abril 27.
Kabayatanna, mamati daytoy nga addaan ti bentahe nu home court ti pagayayaman dagiti atleta gapu ta adda dagiti para cheer-da a mangitunda daytoy a mangipapigsa iti pakinakem dagiti contigents ti nadakamat nga aktibidad.
