LAOAG CITY – Nagballaag ti Department of Health (DOH) iti publiko iti pangta ti nosebleed a masansan a maala ita a nabara ti panawen gapu iti panagngato ti blood pressure.
Inlawlawag ni Department of Health Officer-in-Charge Assistant Secretary ken Deputy Spokesperson Albert Domingo a mapasamak ti panagdaringungo no mairita ti babassit a blood vessels iti nasal mucosa wenno ti pinakalinya ti agong.
Kuna pay ti opisyal a no mairita ken pumutok ket mangitunda ti presyon ti dara wenno makudkod, agbalin a babassit a sugat ken mabalin nga agdara.
Inrakurak ti Department of Health ti panagamak da iti nasao a sakit kalpasan ti insidente iti General Santos City no sadinno nga ado nga estudyante ti nakapasar ti panagdaringungo gapu iti patien da a kinabara ti panawen.
Inpakaammo ti Department of Health a para iti first aid iti nosebleed ket agturong laeng iti nalinong a lugar no na-maexpose iti direkta a silnag ti init wenno agturong iti air-conditioned a lugar.
Mangikabil ti nadalos a tela iti agong nga agdardara tapno malapdan ti panagayos ti dara.
Innayon ti opisyal a kasapulan a kumunsoltar iti doctor tapno naan-anay a maagasan no agtultuloy latta ti panagdara ti agong gapu ta amangan no adda ti underlying health issues malaksid pay iti epekto ti nabara a panawen.
Ginutigot met ni Domingo dagiti mangisursuro nga ibagay dagiti aktibidad kadagiti pagadalan iti maiyannatop nga oras kas ti Physical Education classes ken dadduma pay nga sports a saan a rumbeng nga aramiden iti ruwar mangrugi iti oras ti alas-diyes agingga iti oras ti alas-kwatro ti malem.
Innayon na a nasaysayaat no mangiyuswat laengen ti lectures indoors kangrunaan na no kabara ti panawen.
