LAOAG CITY – Nagballaag ti Department of Health (DOH) iti publiko a ti panaglako ti organ kas ti kidney ken dalem ket maysa a klase ti human trafficking.
Inlawlawag ni Department of Health Spokesperson Asec. Albert Domingo a ti panaglako ti organ ket arigna panagilako metlaeng ti bukod a bagi.
Kuna na a no voluntary donation ket isu ti awaten da gapu ta makatulong daytoy a mangsalbar ti biag ti maysa a pasyente.
Nupay kasta, inpetteng na a no pagbalinen laeng a negosyo ti panaglako ti organ ket saan a nainkalintegan ken maibilang daytoy nga human trafficking.
Nagpalagip ni Domingo a ti panagdonar ti organ ket nakapatpateg a tulong para iti pasyente nga agkasapulan ngem kasapulan ti naan-anay a proseso kas ti medical screening ken ethics clearance.
Immuna iti daytoy, adda ti rinaot dagiti kameng ti National Bureau of Investigation a maysa a balay idiay Bulacan a daytoy ket agserserbi kas pagnaedan dagiti mayat nga aglako ti organ na a mabayadan agingga iti 200 a ribo a pisos.
