LAOAG CITY – Ginutigot ti Department of Health (DOH) ti publiko a gundawayan ti outpatient dental benefits ti Philippine Health Insurance Corporation wenno PhilHealth nga agbalor agingga iti ₱1,000 iti kada miyembro, kas paset ti primary care package.
Inrakurak dagiti opisyal ti Department of Health a napateg ti preventive dental care gapu ta nasaksakit , nagasgastos ken narigrigat nga agasan dagiti advanced a problema iti ngipen.
Segun ken ni DOH Undersecretary Dr. Emmie Liza Perez-Chiong, nasaysayaat no agpakita a dentista dua a daras iti maysa a tawen ken no mabalbalin ket masansan ti panagpakita para kadagiti alisto a kaptan ti plaque.
Ginutigot pay ni Perez-Chiong dagiti nagannak nga ikabil a dagus ti anak iti dentist apaman nga agtubo ti umuna a ngipen tapno nasapa a maimula ti usto a dental habits.
Sakopen ti PhilHealth dental benefit ti dua a dental cleaning iti kada tawen, dental checkup, fluoride application para kadagiti ubbing ken nataengan, kasta pay ti pit ken fissure sealants tapno maliklikan ti pannakadadael ti ngipen uray awan pay ti cavities na.
Kabayatanna, inbatad ni DOH Secretary Teodoro Herbosa nga agdama ti panang-accredit ti PhilHealth dagiti dentista nga agawat ti pasyente iti babaen ti dental benefit package.
