LAOAG CITY – Nagpalagip ti Department of Health (DOH) iti publiko a saann a mailaklako dagiti organ wenno lalaem ti tao ken rumbeng a dumalan iti umiso a proseso para iti organ donation ken transplantation.
Segun ken ni Department of Health Undersecretary Dr. Albert Domingo, ti mangidadaulo ti Essential Life-Saving Services Cluster, napateg ti Philippine Network for Organ Sharing (PhilNOS) iti panangiwaras ti ammo maipanggep iti organ donation, ken ti patas ken etikal a panangilatang kadagiti organ.
Kuna na nga adda ti sistema ti Philippine Network for Organ Sharing para iti dagus a referral ken panagiproseso kadagiti possible nga organ donor, patas nga allocation, ken naurnus a panagala ken panangisayangkat ti organ transplantation.
Dinakamat pay ni Domingo ti advisory ti National Kidney and Transplant Institute iti napalabas a bolan a nagpalagip iti publiko nga agbalin a naannad kadagiti rakurak maipanggep iti panaglako ti kidney.
Daytoy ket kalpasan dagiti nagte-trend nga angaw iti social media no sadinno nga adda ti sumagmamano a personalidad a mangibagbaga nga ilaklako wenno it-ited da ti kidney da kasukat ti gadgets, a no dadduma ket kabulbulon ti edited wenno AI-generated images.
