LAOAG CITY – Inalerto ti Department of Health ti surveillance system kalpasan nga indeklarar ti Africa Centers for Disease Control and Prevention (CDC) ti public health emergency gapu iti mpox outbreak iti pagilian da.
Maipalagip nga indeklarar ti Africa Centers for Disease Control and Prevention ti public health emergency of continental security gapu iti panagngato ti kaso ti mpox wenno monkeypox.
Nagwaras daytoyen iti Democratic Republic of Congo agingga kadagiti kaparanget na a pagilian.
Segun ken ni Department of Health spokesperson Assistant Secretary Albert Domingo, iti agdama ket umabot paylaeng iti siyam ti kaso ti nasao a sakit iti Pilipinas.
Manipod iti nasao a bilang, uppat ditoy ket nadetect idi 2022 idinto a ti lima pay a kaso ket nairekord iti napalabas a tawen.
Basar iti World Health Organization (WHO), dagiti sintomas ti mpox ket pakairamanan ti skin rash a buyugan ti panaggurigor, panagsaksakit ti ulo, susuop, likud ken agkakapsot.
Idi Hulyo 2022 ket indeklarar ti World Health Organization ti mpox kas maysa a public health emergency of international concern ken nagngudo ti deklarasyon idi Mayo ti napalabas a tawen.
